Juventusi është abonuar me barazimet në Serie A. 1-1 u mbyll sfida shtëpiake ndaj Atalantës, takim ku Cristiano Ronaldo humbi një penallti dhe Berat Gjimshiti shkëlqeu në mbrojtjen e miqve.
Barazimi i gjashtë në 12 javë kampionat për bardhezinjtë, teksa trajneri Andrea Pirlo shfaqet i mërzitur për rezultatin në prononcimin e dhënë për Sky Sport.
“Në pjesën e parë ishim të shkëlqyer. Sot luajtëm përballë një kundërshtari shumë të fortë dhe luajtëm si të barabartë ndaj tyre. Në momentin që duhet të hedhim një hap cilësor përpara si sonte, i marrim ndeshjet lehtë dhe nuk ia dalim të fitojmë.
Nuk duhet ta diskutojmë fitoren në këto lloj ndeshjesh. Krijuam shumë raste, por nuk arritëm të mbyllnim takimin. Kur s’e bën këtë gjë, gjithçka mund të ndodhë“, deklaron Andrea Pirlo. /abcnews.al
