E ardhmja e Leo Messit është tema më e diskutueshme te Barcelona. Ylli argjentinas ndodhet në vitin e fundit të kontratës dhe zërat e merkatos e lidhin me një transferim te Manchester City.
Trajneri i ekipit katalanas, Roland Koeman ka folur para sfidës së nesërme kundër Atletico Madrid në lidhje me “pleshtin”, ndalet te raporti mes kapitenit dhe Griezmann, si dhe e mbyll me Guardiolën.
“Leo ka edhe një vit kontratë me ne. Ai duhet të vazhdojë të qëndrojë te Barcelona, por nuk jam unë ai që duhet ta bind. Është e jashtëzakonshme ajo që ka bërë ky futbollist për këtë klub, por së ardhmes nuk i dihet kurrë.
Ai është i vetmi person që duhet të marrë një vendim për të ardhmen. Raporti i tij me Griezmann? Nuk kam parë në asnjë moment raport jo të mirë mes tyre, tentohet gjithmonë të krijohet polemikë në lidhje me këtë temë, por është mungesë respekti.
Guardiola? Pep e adhuron Manchester City dhe më vjen shumë mirë që vendosi të rinovojë kontratën. Jam i kënaqur dhe i lumtur për të“, thekson trajneri holandez i skuadrës katalanase. /abcnews.al
