Në Shkodër po e presin me entuziazëm të madh sfidën e nesërme në kampionat kundër Tiranës. Klasikja e futbollist shqiptar vjen në javën e tretë këtë sezon dhe dy skuadrat do të përballen mes tyre në “Loro Boriçi”, duke nisur prej orës 16:45.
Përkrah trajnerit Thomas Brdaric ishte dhe Arsid Kruja në konferencën e zakonshme për shtypin. 27-vjeçari beson te fitorja kundër kampionëve në fuqi dhe flet rreth ndryshimit që ka pësuar skuadra shkodrane
“Jo vetëm ne, por gjithë Shqipëria e di rëndësinë e kësaj ndeshje. Besoj te rezultati pozitiv. Kam luajtur shumë derbi si puna e kësaj ndeshje, nesër do të dalim me fitore. Kampionati është shumë i gjatë dhe është herët për të folur, pasi edhe nëse fitojmë nuk do të dalim kampionë. Ne do të vazhdojmë të bëjmë punën tonë, t’i marrim ndeshje seriozisht dhe në fund të bëjmë llogaritë.
Tifozët? Ata janë lojtari jonë i 12-të, por s’kemi ça bëjmë pasi kështu janë rregullat. Ne do të bëjmë punën tonë dhe do t’i kënaqim tifozët, edhe pse nuk do të jenë në stadium. Tifozët janë një mungesë e madhe për ne, pasi luajmë në shtëpi. Të kesh një ndeshje derbi me tifozët është një pikë e rëndësishme, por besoj se ne do të arrijmë fitoren.
Përpiqem që çdo ditë në stërvitje të jap maksimumin. Si rrjedhojë e punës së bërë kanë ardhur edhe rezultatet. Të gjithë lojtarët gëzojnë një formë shumë të mirë, shpresoj të vazhdojmë kështu deri në fund.
Ndryshimi me sezonin e kaluar? Për fat të mirë, gjërat kanë ndryshuar për mirë këtë sezon dhe kjo shihet te rezultatet. Shpresoj të kemi edhe fat pasi në futboll duhet të kesh edhe fat. Shpresoj të arrijmë objektivin e klubit. Do të ishte kënaqësi të shënoja, por pak rëndësi ka kush shënon. E rëndësishme është fitorja“, thekson Kruja. /abcnews.al
