Talibanët i kanë bërë thirrje administratës së ardhshme të Shteteve të Bashkuara, e cila do të udhëhiqet nga presidenti i zgjedhur, Joe Biden, që t’i përmbahet marrëveshjes së muajit shkurt për tërheqjen e trupave amerikane nga Afganistani, raporton economictimes.
Shtetet e Bashkuara tashmë kanë filluar tërheqjen e trupave sipas kësaj marrëveshjeje dhe tërheqja e plotë pritet të përfundojë në maj të vitit të ardhshëm, nëse palët u përmbahen premtimeve. Ndërkohë talibanët janë ende duke vazhduar bisedimet e paqes me qeverinë afgane në Doha të Katarit.
“Emirati Islamik i bën thirrje presidentit të zgjedhur amerikan dhe administratës së tij të ardhshme se zbatimi i marrëveshjes është mjeti më i arsyeshëm dhe më efektiv për përfundimin e konfliktit mes dy vendeve tona”, thuhet në deklaratën e grupit militant.
Pavarësisht zhvillimit të bisedimeve për paqe, dhuna në Afganistan nuk është ndalur. Talibanët kanë sulmuar kryeqytetet provinciale, duke nxitur në disa raste edhe reagimin e Shteteve të Bashkuara përmes sulmeve ajrore.
Presidenti në largim i Shteteve të Bashkuara, Donald Trump, kishte premtuar se do t’i jepte fund luftës në Afganistan dhe se trupat amerikane do të tërhiqeshin deri në fund të dhjetorit. s.ba/abcnews.al
