Mesfushori i Milanit, Hakan Calhanoglu, është drejt një transferimi në Premier League. Të njëjtin fat si turku mund të ketë edhe ish-lojtari i kuqezinjve, sulmuesi brazilian Alexandre Pato.
Calhanoglu është në një formë të jashtëzakonshme këtë sezon dhe ka tërhequr vëmendjen e Manchester United. Sipas raportimit të “Gazzetta dello Sport”, drejtuesit e klubit anglez po përgatisin një kontratë pesë-vjeçare për të.
Kujtojmë që lojtari është në vitin e fundit të kontratës me Milanin dhe palët ende nuk po gjejnë një gjuhë të përbashkët për rinovimin, pasi edhe pretendimet e fantazistit janë rritur dhe janë disa klubet që i janë vënë pas.
Ndërkohë, situata e Patos po monitorohet me kujdes nga Birmingham City. Klubi anglez ka shfaqur interes për shërbimet e 31-vjeçarit, i cili aktualisht është pa ekip. Sulmuesi u largua me konsensus nga Sao Paolo në muajin gusht. /abcnews.al
