Golden State është vetëm një hap larg titullit në basketbollin amerikan. Kampionia në fuqi arriti fitoren e tretë radhazi ndaj Cleveland-it, falë paraqitjes së Kevin Durant.
Vendosi ta zgjidhte vetë këtë herë.
Edhe pse nuk mund të jetë më i miri në botë, Kevin Durant është aq i madh sa ta çojë skuadrën e tij drejt fitores, madje drejt titullit.
Falë tij, Golden State është vetëm një hap larg fitores së kampionatit në NBA, duke kryesuar 3-0 në Finalen e madhe ndaj Cleveland.
Basketbollisti 29-vjeçar shënoi plot 43 pikë në sfidën më të vështirë, atë në fushën e Kavaliersëve, ku pritej reagimi i vendasve pas dy humbjeve në Oklend.
Nëse Lebron Xhejms e Cleveland nuk ia dolën, kjo ishte së pari për faj, apo për meritë të Durantit.
Ai kapi edhe 13 topa në tabela si dhe shërbeu 7 asistë për shokët, duke treguar se paraqitja e tij e madhe nuk ishte thjesht realizim koshash.
Asnjë skuadër deri më sot nuk ka mundur të kthejë një rezultat 0-3 në finalet e NBA-së, ndërsa Lebroni e pranoi se është shumë e vështirë të konkurrosh me kampionët në fuqi.
Kur luan ndaj tyre, duket sikur po luan ndaj Patriotsave, u shpreh ai, duke aluduar për skuadrën e madhe të futbollit amerikan.
Vetë Lebron pati një ndeshje shumë të mirë, madje shënoi një kosh krejt të veçantë, si dikur Michael Jordan në finalet ndaj Lakers.
Ai do të mbetet në histori dhe do të kujtohet edhe shumë vjet më vonë, por titulli duket se i iku nga dora edhe një vit tjetër.
Falë yjeve si Durant, Curry, Thompson apo Green, Golden State duket i papërballueshëm.
I duhet vetëm një fitore për t’u shpallur kampion për herë të dytë radhazi, dhe për herë të tretë në 4 vitet e fundit.
Siç komentojnë mediat amerikane, në NBA po krijohet një dinasti e re./abcnews.al
