Ditën e nesërme Milani pritet të luajë kundër Rio Aves për të siguruar një vend në fazën e grupeve të Europa League. Kuqezinjtë do të shkojnë në transfertën e Portugalisë me moralin e ngritur, pasi kanë plot 17 ndeshje që nuk njohin humbje. Mesfushori Sandro Tonali beson tek rezultati pozitiv në sfidën e radhës dhe shprehet se sekreti qëndron tek grupi.
“Ne jemi të përqëndruar për Rio Aven, ku do të tentojmë të fitojmë dhe me lojë bindëse. Kjo është ajo që të gjithë duam dhe ne e dimë shumë mirë rëndësinë e kësaj ndeshjeje. Ne u përqëndruam në ndeshje kundër Crotones dhe morëm tre pikët, ndërsa tashmë i gjithë ekipi e ka mendjen tek skuadra portugeze.
Shumë lojtarë po kthehen nga dëmtimet dhe ky është një lajm shumë i mirë për ne. Me kaq shumë ndeshje brenda pak ditësh, është shumë e rëndësishme që të gjithë lojtarët të jenë të gatshëm. Ne kemi nevojë për të gjithë lojtarët dhe nëse qëndrojmë të gjithë së bashku do ia dalim në çdo sfidë,”deklaron Tonali për “MilanTV”. /abcnews.al
