FSHF dhe partnerët e saj kishin premtuar ndërtimin e disa shtëpive në zonën e Bubqit, e prekur nga tërmeti i nëntorit të vitit të shkuar. Ditën e sotme është hedhur edhe gurë-themeli i parë për ndërtimin e shtëpive dhe në Bubq ka qenë vetë presidenti Armand Duka, së bashku me trajnerin Edy Reja dhe futbollistët Etrit Berisha, Elseid Hysaj dhe futbollistja Megi Doçi.
Kreu i FSHF, për mediat deklaroi: “Pandemia na bëri ta ndërprisnim për njëfarë kohe iniciativën e ndërmarrë për të ndërtuar shtëpitë e shkatërruara prej tërmetit. Federata jonë, bashkë me federata të tjera, së bashku me trajnerin Reja dhe lojtarët. Pas kësaj, do të ndërtojmë edhe tre shtëpi të tjera, për ata që janë më në nevojë.
Edhe trajneri ka kontribuar nga financat e veta, Hysaj, Berisha, edhe federata të tjera, si ajo italiane. Normal kjo nuk e zgjidh problemin, por është një solidaritet nga të gjithë ne për t’ua lehtësuar dhimbjen atyre që kanë humbur shtëpitë. Normal ka qenë diçka e dhimbshme për këta njerëz të jetojnë në çadra”.
Më pas e mori fjalën trajneri Reja: “Synimi ynë është të jemi pjesëmarrës në rindërtimin e shtëpive. Siç e tha edhe presidenti, pandemia i ndaloi disi punimet. Ky është solidariteti ynë për njerëzit që janë shumë më tepër në nevojë sesa njerëz të zakonshëm.
Jemi shumë të gëzuar që kontribuojmë në këtë rindërtim. Vendosëm gurin e parë, shpresojmë që gjërat të marrin rrugë dhe që sa më shpejt këta njerëz të kthehen në jetë normale, sepse kanë pasur shumë vështirësi. Edhe unë, si dhe stafi im, kemi dhënë ndihmën tonë për ndërtimin e kësaj shtëpie”.
Italiani bën një krahasim me rindërtimin e kombëtares: “Epo mirë, kemi fillimin e garës. Ndërtuam themelet vitin e kaluar, tani duam që të ndërtojmë shtëpinë në mënyrë që të kemi rezultate të rëndësishme. Le të bëjmë një krahasim me ndërtimin e kësaj shtëpie dhe ndërtimin e skuadrës sime. Mund të them se jemi në një moment të mirë, le të shpresojmë ta finalizojmë. Kemi ndërtuar lojën, dhe tani ta konkretizojmë e të bëjmë golat”. /abcnews.al
