J Balvin, i cili pak kohë më parë rezultoi pozitiv me Covid-19 ka rrëfyer së fundmi vështirësitë që ka kaluar gjatë kësaj beteje. Përmes një reagimi në rrjete sociale, artisti shkruan se kishte humbur shpresat, si pasojë e simptomave të rënda që kishte kaluar.
“Më kujtohet kjo foto sepse në atë moment unë i kisha të gjitha simptomat dhe humba shpresën, aq sa ata menduan të më shtronin në spital. Kam vuajtur nga ankthi dhe si rezultat i kësaj ngjarje, ajo u bë edhe më e fuqishme, por unë pranoj dhe ballafaqohem me aspektet që prekin trupin dhe mendjen time.“, shkruan J Balvin.
Më tej, J Balvin shprehet se përpos gjendjes së rëndë për shkak të Covid-19, i është dashur të përballet edhe me ankthin, ndërsa iu bën thirrje të gjithëve që të mos neglizhojnë rregullat dhe të kujdesen për veten dhe familjarët.
“Ndiej në shpirtin tim ata që kanë humbur të afërmit e tyre në këtë situatë të vështirë pandemike, për më tepër, sepse e di që familjet preken jo vetëm emocionalisht, por edhe ekonomikisht dhe profesionalisht. Sot thjesht dua të jem një zë shprese, kjo do të kalojë! Kujdesuni për veten dhe anëtarët e familjes tuaj.“, shkruan artisti latin. /abcnews.al/
