Albion Ademit i kanë mjaftuar vetëm katër minuta për të gjetur golin në ndeshjen e sotme. Sulmuesi i majtë i Mariehamn në elitën e futbolli finlandez (u transferua janarin e këtij viti te kjo skuadër) ka realizuar në ndeshjen jashtë fushe kundër SJK.
21-vjeçari i talentuar shfrytëzoi një kros të Maenpaa nga e djathta dhe u zhyt bukur me kokë, duke dërguar topin në rrjetë dhe duke i dhuruar avantazhit ekipit të tij. Goli i dytë në këtë sezon për sulmuesin shqiptar, teksa po luhet vetëm java e tretë e kampionatit nordik.
Ademi ka lindur në Finlandë, është aktivizuar me përfaqësueset U-17, U-18 dhe U-19 të këtij shteti, ndërsa më pas ka zgjedhur të mbrojë ngjyrat kuqezi. Ai numëron tre ndeshje me Shqipërinë U-21, ndërsa Panucci e grumbulloi dy vite më parë me kombëtaren e madhe, por nuk ia doli të debutojë.
Këtë sezon e ka nisur në mënyrën më të mirë të mundshme dhe po kalon një formë shumë të mirë. Ademi shpreson që paraqitjet pozitive dhe golat, do e ndihmojnë të rikthehet te Shqipëria dhe t’ia dalë të debutojë më në fund me kombëtaren kuqezi. /abcnews.al
