Ardian Ismajli nuk ka rivalë në Kroaci. Mbrojtësi i kombëtares shqiptare vijon të spikasë për Hajduk Split, që ka mposhtur në shtëpi Inter Zapresic dhe është ngjitur në vendin e tretë në kampionat.
Ismajli është përfshirë sërish në formacionin më të mirë të javës dhe kjo ndodh për të nëntën herë, si asnjë lojtar tjetër në kampionatin kroat. Telesport.hr, që publikon javë pas jave më të mirët, referuar të dhënave të “Instatsports”, jep edhe shifrat e mbrojtësit.
Në takimin kundër Inter Zapresic, Ismajli ka gabuar vetëm tre pasime nga 62 të nisura, ndërkohë që ka fituar shumicën e dueleve, 11 nga 17. Një driblim i bërë nga mbrojtësi, i cili ka ndërprerë 5 pasime të rivalëve, ka nisur dy aksione sulmuese dhe ka kapur 11 topa të parë.
Një tjetër lojtarë që ka spikatur këtë javë ka qenë Jon Mersinaj, mbrojtësi i Shqipërisë U21 që po vëzhgohet edhe nga trajneri Edoardo Reja me kujdes. Ish-lojtari i Laçit, në ndeshjen kundër Osijek fitoi 23 duele nga 28, si dhe nxori skuadrën e tij në 6 raste përpara. /abcnews.al
