Benevento ka zhvilluar një sezon të mrekullueshëm deri në momentin që koronavirusi pezulloi çdo aktivitet. Skuadra e drejtuar nga Pippo Inzaghi kryeson Serie B bindshëm dhe rikthimi në elitë është pak pikë larg.
20 pikë më shumë se vendi i dytë kanë “Shtrigat”, duke kryesuar një kampionat ku është tmerrësisht e vështirë për të dominuar. Gjithsesi, ekziston rreziku që Beneventos t’i shkojë dëm e gjitha puna e madhe.
Një nga hipotezat është që sezoni aktual të pezullohet dhe djemtë e Inzaghit nuk do të ngjiteshin dot në Serie A. Opsion të cilin Oliver Kragl nuk e beson dot. 29-vjeçari gjerman është gati të marrë masën ekstreme nëse ndodh diçka e tillë.
“Kemi shkruar historinë këtë sezon me këtë skuadër. Kemi realizuar diçka të çmendur dhe na presin fitore të tjera. Do të ishte një marrëzi nëse na mohojnë kalimin në Serie A. Nëse ndodh diçka e tillë, mund të tërhiqem përfundimisht nga futbolli”, kërcënon Kragl. /abcnews.al
