Emre Can vuajti fazën e parë të këtij sezoni me Juventusin. Përjashtimin nga lista e Champions League e vuajti dhe aktivizimet në kampionat ishin me pikatore për mesfushorin gjerman. Në janar erdhi transferimi te Dortmund, aty ku po aktivizohet si titullar dhe po bën mirë.
26-vjeçari ka folur rreth ofertave të shumta që pati në janar për Kicker. Emre Can deklaron se Manchester United tentoi ta transferonte në “Old Trafford”, por një lojtar si ai, i cili është aktivizuar për katër sezone me Liverpool, nuk mund të pranonte transferimin te “armiqtë e përjetshëm”.
“Kisha tre oferta nga Premier League, mes tyre edhe nga Manchester United. Nuk u tundova kurrë nga oferta e tyre, pasi unë kam luajtur më parë me Liverpool. Gjithmonë kam pasur simpati për Borussia Dortmund. Dëshiroja të shkoja në një klub ku të ndihesha i rëndësishëm dhe t’i shërbeja skuadrës.
Këtu po ndodh kjo gjë. Dortmundi është klubi perfekt për mua dhe unë jam lojtari perfekt për Dortmund. Paratë janë të rëndësishme, por nuk janë gjithçka në jetë“, deklaron mesfushori gjerman. /abcnews.al
