Laçi pret nesër Bylisin në shtëpi. Kurbinasit synojnë tre pikët, për të konsoliduar pozitat e tyre në klasifikim. Bardhezinjtë duan vendin e tretë në klasifikim, në mënyrë që të luajnë në kualifikueset e Europa League sërish. Gara është e vështirë dhe nesër ndaj ballshiotëve është detyrim fitorja.
Klubi kurbinas ka vendosur që hyrja në stadium të jetë falas, ndërkohë që ka edhe një mesazh për tifozët bardhezi. “TË MARSHOJMË PËRPARA, ËSHTË DETYRIM! Kampionati ka hyrë në një fazë ku ka vetëm finale dhe të mërkurën luajmë të radhës.
Në Laç vjen Bylisi, kundërshtar me të cilin luajmë prej orës 14:00. I madh e vogël duhet të jetë në stadium! Historikisht Laçi i ka marrë fitoret me JU dhe jo vetëm që nuk duhet të mungoni, por duhet të sillni edhe dikë më vete në stadium.
NE, me JU, mund të mposhtim këdo. E kemi treguar dhe do ta tregojmë edhe të mërkurën. Drejt fitores së radhës! Mos mungoni! Para Laçi!”, shkruhet në thirrjen që klubi i Laçit u bën tifozëve para ndeshjes me Bylisin, që luhet nesër orës 14:00. /abcnews.al
