Nesër zhvillohet derbi i Madridit. Reali pret Atleticon në “Santiago Bernabeu” (16:00), në një duel të zjarrtë dhe shumë të fortë. Diego Simeone është ndaluar te rikthimi i Yannick Carrascos, duke zbuluar se çfarë i pëlqeu më shumë.
Trajneri i Atletico analizon edhe përballjen me rivalët e qytetit në konferencën për shtyp, duke mos i kursyer elozhet për kolegun Zidane dhe ekipin kundërshtar.
CARRASCO – “Ardhja e Carrascos na lumturon, ai dëshironte të rikthehej te ne. E njohim mirë talentin që ka dhe stili i tij i lojës mund të jetë i dobishëm për ne. Aktivizimi? Nëse dokumentet vijnë shpejt nga Kina, mund të luajë në derbi. Më pëlqeu shumë dëshira e tij për t’u rikthyer tek Atletico“.
DERBI – “Më vjen mirë që një koleg si Zidane flet mirë për mua. Mund të them edhe unë të njëjtat gjëra për të. Zizou është trajneri ideal për Real Madrid. Ka aftësinë për të komanduar atë ekip. Rikthimi i tij e ka kthyer përsëri Realin kompetitiv. Është e vështirë të luash kundër tyre.
Nuk e dimë se si do të luajnë, alternativat e shumta i lejojnë me variante të ndryshme. Derbi do të përcaktohet nga detajet dhe kualiteti i lojtarëve. Ëndërroj të fitoj nesër në Santiago Bernabeu“. /abcnews.al
