Loading ...
Zonja e Parë e SHBA-së, Melania Trump, do të presë të enjten në Shtëpinë e Bardhë përfaqësues nga Moska dhe Kievi, përpara bisedimeve në Abu Dhabi që synojnë t’i japin fund luftës në Ukrainë.
Takimi vjen në një kohë kur negociatat kanë ringjallur shpresat për paqe, ndërsa pushtimi i plotë rus i Ukrainës po hyn në vitin e pestë. Afrimi i fundit mes presidentëve Donald Trump dhe Vladimir Putin ka ngritur gjithashtu shqetësime se Shtetet e Bashkuara mund të distancohen nga Kievi.
Këshilltari i Kremlinit për bashkëpunim ekonomik ndërkombëtar, Kirill Dmitriev, dhe ombudsmania për të drejtat e njeriut, Yana Lantratova, planifikojnë të takohen me Melania Trump të enjten, “nëse realizohen të gjitha përgatitjet logjistike”, raportoi të mërkurën agjencia shtetërore ruse TASS, duke cituar zëdhënësin e Kremlinit, Dmitry Peskov.
Edhe ombudsmani ukrainas për të drejtat e njeriut, Dmytro Lubinets, njoftoi se do të takohet me zonjën e Parë amerikane në Uashington.
“Jam nisur drejt Uashingtonit. Na presin takime të rëndësishme. Por, derisa jam rrugës, dua t’ju pyes diçka: Nëse do të mund t’i përcillnit një mesazh të vetëm zonjës së Parë të SHBA-së, Melania Trump, çfarë do t’i thoshit”, shkroi ai të mërkurën në Facebook.
Zyra e Melania Trump kishte bërë të ditur më herët se ajo do të bashkonte personalisht në Shtëpinë e Bardhë përfaqësuesit e Rusisë dhe Ukrainës, dy vende që aktualisht janë në luftë.
Takimi zhvillohet pasi presidenti ukrainas, Volodymyr Zelenskyy, deklaroi se kishte zhvilluar bisedime “shumë të hollësishme, që zgjatën një orë e gjysmë” me të dërguarit amerikanë Steve Witkoff dhe Jared Kushner, në prag të takimit të javës së ardhshme në Abu Dhabi. Këto pritet të jenë bisedimet e para mes të tri palëve që nga shkurti.
Të mërkurën, Zelenskyy i akordoi Melania Trump një dekoratë shtetërore ukrainase, në shenjë vlerësimi për rolin e saj në ndërmjetësimin e një armëpushimi të pjesshëm, i cili mundësoi evakuimin e civilëve nga një qytet nën pushtimin rus.
