Loading ...
Presidenti amerikan Donald Trump ka deklaruar se është i gatshëm të përdorë kompetencat e tij presidenciale për të penguar nismat legjislative të demokratëve, në rast se ata marrin kontrollin e Dhomës së Përfaqësuesve ose të Senatit.
Në një intervistë telefonike për CBS News, Trump theksoi se ka në dispozicion një instrument të fuqishëm për të kundërshtuar axhendën demokrate: veton presidenciale.
“Unë kam fuqinë përfundimtare – quhet veto”, u shpreh presidenti amerikan, duke thënë se është i gatshëm të marrë edhe nofkën “Zoti Veto” në raport me demokratët.
Trump iu referua gjithashtu vendimit të Gjykatës Supreme në çështjen Trump kundër Slaughter, të cilin e konsideroi një precedent që zgjeron ndjeshëm kompetencat e presidentit për të ushtruar kontroll mbi agjencitë dhe institucionet federale.
“Çështja Slaughter na dha fuqi të jashtëzakonshme presidenciale, të cilat presidenti nuk i kishte pasur më parë”, deklaroi Trump.
Sipas tij, edhe nëse demokratët fitojnë shumicën në njërën apo të dyja dhomat e Kongresit, administrata do të ketë hapësirë të konsiderueshme për të vijuar zbatimin e politikave të saj, veçanërisht në fushën e emigracionit, tregtisë, sigurisë kombëtare dhe administrimit të qeverisë federale.
Presidenti paralajmëroi se përdorimi i vazhdueshëm i vetos mund t’i detyrojë demokratët të negociojnë marrëveshje dypalëshe me Shtëpinë e Bardhë.
Gjatë intervistës, Trump foli edhe për zgjedhjet afatmesme, duke pretenduar se turneu i tij elektoral, gjatë të cilit zhvilloi dhjetëra tubime, kishte ndikuar në mobilizimin e mbështetësve republikanë.
Ai nuk dha një parashikim të prerë për rezultatin, por u shpreh se republikanët kishin ende mundësi për të arritur një rezultat pozitiv.
Ndërkohë, Trump foli edhe për projektet e tij të rikonstruksionit në Uashington, duke konfirmuar se synon të përfundojë sallën e re të ballove në Shtëpinë e Bardhë dhe të nisë punën për ndërtimin e një harku monumental 250 metra të lartë.
Sa i përket zgjedhjeve presidenciale të vitit 2028, Trump tha se ende nuk ka diskutuar me këshilltarët e tij për një kandidim të mundshëm, duke theksuar se Partia Republikane ka disa kandidatë potencialë.
Deklaratat e presidentit vijnë në një kohë tensionesh të mundshme mes Shtëpisë së Bardhë dhe Kongresit, ndërsa mbetet për t’u parë se si do të ndikojë përbërja e re e legjislativit në zbatimin e axhendës së administratës amerikane.
