Loading ...Një konflikt në zonën e Spillesë, Rrogozhinë, është parandaluar të përshkallëzohej në një ngjarje të rëndë kriminale, pas ndërhyrjes së menjëhershme të Policisë.
Një 31-vjeçar u kap në flagrancë me armë zjarri kallashnikov dhe u vu në pranga.
Policia bën me dije se pas marrjes së informacionit në rrugë operative për një konflikt në zonën e Spillesë, shërbimet e Komisariatit të Policisë Kavajë dhe Postës së Policisë Rrogozhinë ndërhynë menjëherë në vendngjarje.
Gjatë ndërhyrjes, efektivët kapën në flagrancë shtetasin E. H., 31 vjeç, i cili mbante me vete një armë zjarri tip kallashnikov, së bashku me municion luftarak.
Nga veprimet e para hetimore dyshohet se 31-vjeçari ishte konfliktuar me shtetasin Indrit Rama, 38 vjeç, dhe më pas kishte tentuar ta vriste atë me armë zjarri.
Ndërhyrja e shpejtë e Policisë bëri të mundur parandalimin e përshkallëzimit të konfliktit dhe shmangien e pasojave të rënda për jetën e 38-vjeçarit.
Arma e zjarrit kallashnikov dhe municioni luftarak u sekuestruan në cilësinë e provës materiale.
Në vijim të veprimeve hetimore, Policia ka proceduar penalisht edhe shtetasin Indrit Rama pasi dyshohet se ka goditur me grushte shtetasin Neldi Hallulli , duke i shkaktuar dëmtime të lehta trupore.
Materialet procedurale i janë referuar Prokurorisë për veprime të mëtejshme.
