Loading ...
A janë vërtet të nevojshme produktet dhe kurat e shpejta për detoksifikimin e zorrëve? Apo organizmi ynë ka mekanizmat e vet natyralë për t’u pastruar?
I ftuar në studion e ABC-së së Mëngjesit, mjeku imazherist Luciano Bardhi shpjegon se shëndeti i zorrëve është një nga faktorët më të rëndësishëm për mirëqenien e përgjithshme të organizmit, por paralajmëron se shumë nga metodat e promovuara si “detoks” nuk mbështeten nga provat shkencore.
Sipas tij, ushqimi i zorrëve me baktere të mira përmes një diete të pasur me fibra, fruta, perime dhe ushqime natyrale është rruga më e sigurt për të mbështetur mikrobiomën dhe funksionimin normal të sistemit tretës. Edhe agjërimi periodik po tërheq gjithnjë e më shumë vëmendjen e studiuesve, pasi mund të ndihmojë organizmin në proceset e rigjenerimit qelizor dhe në përmirësimin e metabolizmit.
Një tjetër temë që ngjall debat është përdorimi i klizmave për “pastrimin” e zorrëve. Bardhi thekson se nuk ka prova shkencore që klizmat mund të largojnë toksinat nga organizmi. Në mjekësi ato përdoren kryesisht në raste të kapsllëkut të rëndë ose kur rekomandohen nga mjeku për arsye specifike.
Ndërkohë, klizmat e përgatitura në shtëpi me ujë me limon, uthull apo kafe mund të jenë problematike dhe të shoqërohen me komplikacione. Përdorimi i shpeshtë mund të shkaktojë irritime, dhimbje në rektum, gjakderdhje dhe madje dëmtime të murit të zorrës.
Mjeku ndalet edhe te roli i ushqimeve natyrale në luftën kundër inflamacionit. Veçanërisht të vlefshme konsiderohen frutat e egra si boronicat, manaferrat, mjedrat dhe mani, të cilat përmbajnë substanca bioaktive me efekte të rëndësishme antioksiduese dhe anti-inflamatore.
Këto fruta lidhen me përmirësimin e shëndetit të mikrobiomës, mbështesin funksionin e mëlçisë dhe sistemit imunitar, ndërsa disa studime sugjerojnë se mund të ndikojnë edhe në proceset qelizore që lidhen me jetëgjatësinë dhe mbrojtjen e trurit.
Sot shkenca po i kushton gjithnjë e më shumë vëmendje lidhjes mes zorrëve dhe trurit. Ka studime që sugjerojnë një lidhje të fortë midis çrregullimeve të mikrobiomës së zorrëve dhe sëmundjeve neurodegjenerative si Parkinsoni, duke e bërë sistemin tretës një nga fushat më intriguese të kërkimeve moderne mjekësore. Mesazhi kryesor i specialistëve mbetet i qartë: shëndeti nuk vjen nga “pastrimet e mrekullueshme”, por nga ushqimi i balancuar, aktiviteti fizik, kujdesi për mikrobiomën dhe zgjedhjet e përditshme që bëjmë për organizmin tonë./abcnews.al
