Loading ...
Kryeministri i Holandës, Rob Jetten, ka zhvilluar komunikimin e tij të parë zyrtar telefonik me kryeministrin, Edi Rama. Në këtë bisedë të nivelit të lartë është theksuar rëndësia e rolit që Tirana luan në ruajtjen e stabilitetit dhe nxitjen e zhvillimit në Ballkanin Perëndimor.
Në një deklaratë të publikuar në rrjetin social “X”, Jetten e ka përshkruar Shqipërinë si një “partner strategjik kyç”, jo vetëm për interesat e Holandës, por edhe për vetë Bashkimin Evropian.
Gjatë bisedës, dy liderët janë ndalur te marrëdhëniet e qëndrueshme dypalëshe, duke theksuar se bashkëpunimi i deritanishëm ka krijuar një bazë solide për iniciativa të reja.
“Lidhjet tona ekonomike dhe bashkëpunimi në fushën e sigurisë janë tashmë të konsoliduara. Diskutuam për mundësitë e zgjerimit të mëtejshëm të partneritetit, për shembull në infrastrukturë dhe turizëm,” është shprehur Jetten, duke lënë të kuptohet një interes në rritje për investime të huaja direkte nga Holanda në Shqipëri.
Had a pleasant first call with Prime Minister @ediramaal of Albania, a key strategic partner in the Western Balkans for both the Netherlands and the EU.
Our economic ties and security cooperation are already strong. We discussed scope for further expanding our partnership, e.g.… pic.twitter.com/ZEQQAFFMNT
— Rob Jetten (@MinPres) April 23, 2026
Një pjesë e rëndësishme e telefonatës iu kushtua edhe rrugëtimit evropian të Shqipërisë. Jetten ka vlerësuar përparimin e reformave të ndërmarra nga qeveria shqiptare në funksion të afrimit me standardet e Bashkimit Evropian.
“Diskutuam gjithashtu për hapat e rëndësishëm që Shqipëria po ndërmerr për të përmbushur kriteret e procesit të pranimit në BE. Pres me interes të takohem me Kryeministrin Rama në samitin BE-Ballkani Perëndimor në qershor,” ka theksuar ai në postimin e tij.
