Loading ...
Ushtria izraelite njoftoi se ka goditur mbi 100 objektiva që i cilësoi si pozicione dhe seli të Hezbollahut në Bejrut, Luginën e Bekaa dhe në jug të Libanit, në një seri sulmesh ajrore.
Sipas Ministrisë së Shëndetësisë në Liban, të paktën 89 persona kanë humbur jetën dhe mbi 700 të tjerë janë plagosur, ndërsa një zyrtar i lartë iranian paralajmëroi se Izraeli do të “ndëshkohet” për atë që e quajti një krim.
Raportimet nga terreni tregojnë se sulmet kanë shënjestruar ndërtesa banimi, xhami dhe automjete në disa zona të vendit. Sipas mediave ndërkombëtare, operacionet e shpëtimit janë ende në zhvillim, ndërsa dëmet materiale janë të konsiderueshme.
Në kryeqytetin Bejrut, disa sulme goditën zonat qendrore dhe periferitë jugore. Një ndërtesë në lagjen Corniche al-Mazraa raportohet të jetë rrafshuar plotësisht.
Ndërkohë, bombardimet janë intensifikuar edhe në jug dhe lindje të vendit. Sulme të shumta janë raportuar në qytetet bregdetare Tiro dhe Sidon.
