Loading ...
Njësia e Antiterrorit në Policia e Shtetit pritet të forcojë ndjeshëm kapacitetet e saj operacionale falë pajisjes me dronë të teknologjisë së fundit, të prodhimit amerikan.
Lajmi u dha nga Ambasada Amerikane në Shqipëri, e cila thotë se dronët janë të pajisur me teknologji të avancuar të imazheve termike, e cila mundëson monitorim të vazhdueshëm si gjatë ditës ashtu edhe gjatë natës.
Kjo teknologji pritet të rrisë ndjeshëm aftësinë e Policisë së Shtetit për të mbikëqyrur situata të ndjeshme, për të përmirësuar kontrollin e kufijve dhe për të gjurmuar individë apo grupe të përfshira në aktivitete të dhunshme apo të paligjshme.
“Njësia e Antiterrorit në Policinë e Shtetit po pajiset me dronët më të fundit të prodhimit amerikan. Me teknologjinë e imazheve termike, këta dronë mund të rrisin aftësinë e Policisë së Shtetit në monitorimin e situatave ditë e natë për të mbrojtur kufijtë dhe për të gjurmuar elementët e dhunshëm”, thuhet në njoftimin e Ambasadës Amerikane.
