Loading ...
Një gjykatës federal ka hedhur poshtë shumicën e pretendimeve të Blake Lively kundër Justin Baldoni për ngacmim seksual. 10 nga 13 akuzat e aktores së It Ends With Us në padinë që ajo kishte ngritur kundër Baldoni, u rrëzuan me një vendim gjykate.
Mes tyre ishin pretendimet e Lively për ngacmim seksual, konspiracion dhe shpifje. Vetëm tre nga pretendimet e aktores do të dëgjohen tani në gjyq: shkelje e kontratës, hakmarrje dhe ndihmë dhe inkurajim në hakmarrje.
Avokatët e Lively kishin pohuar se Baldoni ishte “vazhdimisht i papërshtatshëm” me klienten e tyre dhe “e puthte dhe e prekte” atë pa pëlqimin e saj. Lively e akuzoi Baldonin se e kishte ngacmuar seksualisht duke bërë komente të padëshiruara në lidhje me pamjen dhe peshën e saj gjatë xhirimeve të filmit.
I publikuar në vitin 2024, filmi “It Ends With Us” ishte një hit global dhe fitoi më shumë se 350 milionë dollarë, por shpejt u zbeh nga thashethemet për konflikt midis Lively dhe Baldonit. Çështja ka zbuluar mesazhet private të Lively-t me personazhe të tjerë të famshëm si Taylor Swift dhe Ben Affleck.
Ndërkohë një gjyqtar vitin e kaluar rrëzoi kundërpadinë e Baldonit prej 400 milionë dollarësh kundër Lively, e cila pretendonte zhvatje civile, shpifje dhe shkelje të privatësisë. Çështja, me akuzat që kanë mbetur, tashmë do të shkojë në gjyq në maj pasi ndërmjetësimi dështoi muajin e kaluar./abcnews.al
