Loading ...
Sekretari i Përgjithshëm i OKB-së, Antonio Guterres, bëri sot një vizitë të papritur në Liban, të cilën e përshkroi si një “vizitë solidariteti”, ndërsa vendi po përballet me valë sulmesh izraelite.
Populli i Libanit “nuk e zgjodhi këtë luftë”, tha Guterres. “Ata u tërhoqën në të”. Pas sulmeve të SHBA-së dhe Izraelit ndaj Iranit, milicia pro-iraniane Hezbollah filloi të lëshojë raketa drejt objektivave në Izrael.Izraeli është kundërpërgjigjur me sulme të gjera ajrore.
Sipas Guterres, qindra civilë në Liban janë vrarë dhe më shumë se 800 000 njerëz janë zhvendosur brenda vendit.
Kreu i OKB-së u bëri thirrje vendeve të komunitetit ndërkombëtar të sigurojnë edhe 300 milionë dollarë shtesë për ndihmë humanitare për popullin libanez.
“OKB-ja dhe unë nuk do të kursejmë asnjë përpjekje për të punuar drejt një të ardhmeje paqësore, të cilën Libani dhe ky rajon e meritojnë kaq shumë”, tha ai.
Gjatë vizitës së tij, Guterres u takua me presidentin libanez Joseph Aoun, kryetarin e parlamentit Nabih Berri dhe kryeministrin Nawaf Salam.
