Loading ...
Vatikani njoftoi të martën se Papa Leoni XIV ka pranuar shkarkimin e një peshkopi katolik në San Diego, i cili u arrestua nga autoritetet lokale nën dyshimin për vjedhjen e rreth 250 mijë dollarëve nga komuniteti i tij fetar.
Peshkopi Emanuel Hana Shaleta, i cili drejtonte komunitetin e vogël katolik kaldeas në qytetin e Kalifornisë që nga viti 2017, është shpallur fajtor për 16 akuza që lidhen me përvetësim fondesh dhe pastrim parash gjatë një seance gjyqësore të mbajtur të hënën, sipas mediave lokale.
Zëvendësprokurori i distriktit në San Diego, Joel Madero, tha se krimet e dyshuara kanë ndodhur gjatë vitit 2024 dhe u raportuan nga një punonjës i kishës, i cili vuri re mungesën e fondeve.
Sipas një deklarate, Hana Shaleta u arrestua më 5 mars në aeroportin ndërkombëtar të San Diegos, ndërsa po përpiqej të largohej nga Shtetet e Bashkuara.
Avokati i peshkopit deklaroi gjatë seancës së së hënës se klienti i tij po udhëtonte drejt Gjermanisë për një udhëtim të planifikuar më herët.
Katolikët kaldeas e njohin autoritetin e Papës, por praktikat e tyre fetare zhvillohen sipas një riti liturgjik lindor. Sipas statistikave të Vatikanit, në San Diego jetojnë rreth 71 mijë katolikë kaldeas.
/ abcnews.al /
