Loading ...KORÇË- Rreth 1 ton mjaltë është bllokuar në Pikën e Kalimit Kufitar Kapshticë, pasi gjatë kontrollit u konstatuan mangësi në dokumentacionin shoqërues të mallit.
Sipas burimeve zyrtare, subjekti importues nuk dispononte dokumentacionin e plotë që vërteton përmbushjen e standardeve të sigurisë ushqimore, një kriter thelbësor për lejimin e hyrjes së produkteve në tregun shqiptar.
Menjëherë pas konstatimit të shkeljes, autoritetet doganore vendosën bllokimin e ngarkesës dhe sistemimin e saj në magazinën doganore, ku do të qëndrojë deri në përfundimin e analizave laboratorike dhe procedurave administrative e ligjore.
Strukturat përgjegjëse theksojnë se kontrollet në kufi janë intensifikuar dhe se do të vijojnë me tolerancë zero ndaj çdo tentative për të importuar produkte në kundërshtim me legjislacionin në fuqi.
