TIRANË- Ish-kryeministri Sali Berisha shkoi paraditen e së hënës në SPAK duke iu bindur masës së caktuar nga Apeli i Gjykatës së Posaçme.
Ai akuzoi sërish drejtësinë, ndërsa një grup i vogël njerëzish protestuan në mbështetje të tij para ambienteve të SPAK.
Gazetari Ardit Rada i ftuar në “Ora e Fundit” tha se paraqitja e Sali Berishës në SPAK nuk përbën asgjë të re, në lidhje me procesin e tij hetimor.
Ai pohoi se Sali Berisha i konsumoi demokratëve dhe drejtësisë një vit kohë, pasi i gjithë procesi është kthyer tek masa që kishte caktuar një vit më parë Gjykata e Posaçme.
Sipas tij, Berisha luftën e tij po e zhvillon kundër drejtësisë dhe vendeve perëndimore, të cilat janë mbështetëse kryesore të SPAK.
“Nuk pashë asnjë lloj risie, përveç se Berisha i humbi 11 muaj PD dhe drejtësisë, sepse në thelb është kthyer në pikën zero, në atë që i caktoi fillimisht Gjykata dhe ai refuzoi. Sot ja ku e kemi. Këta njerëz protestonin poshtë ballkoni, sot protestojnë në dyert e organit të akuzës. Organet që gëzojnë mbështetjen maksimale nga publiku, por edhe nga BE dhe SHBA. Kjo protestë do të ngjajë kundër drejtësisë dhe kundër SHBA. Aksioni i tij është kundër drejtësisë dhe kundër perëndimit”, tha ai./abcnews.al
