Presidenti i Federatës Kosovare të Futbollit, Agim Ademi, ka shkruar një mesazh ngushëllimi për të gjithë shqiptarët që janë prekur nga ngjarjet tragjike të orëve të fundit.
Në faqen zyrtare të FFK-së, presidenti Ademi shkroi: “Telegram ngushëllimi dhe solidarizimi për qytetarët e Shqipërisë – 26 nëntor, 2019
Me shqetësim të thellë i kemi ndjekur ngjarjet e fundit pas tërmeteve që goditën mëngjesin e sotëm Shqipërinë, ku si pasojë deri tash janë shënuar 18 viktima dhe janë shkaktuar dëme të mëdha në objekte banimi.
Me këtë rast, në emrin tim, KE të FFK-së dhe tërë komunitetit të futbollit në Kosovë, ju shpreh ngushëllimet më të sinqerta familjeve të viktimave dhe bashkëndjejmë me ta në këto momente të vështira.
FFK solidarizohet me FSHF-në, klubet e futbollit dhe tërë kombin shqiptar në këtë situatë emergjente dhe do të jetë e gatshme të ndihmojë me të gjitha kapacitetet e saj vëllezërit dhe motrat tona në Shqipëri.
Lusim Zotin që kjo gjendje të tejkalohet sa më shpejtë dhe njëherësh shprehim gatishmërinë dhe solidaritetin tonë të plotë me popullin dhe institucionet e shtetit shqiptar, teksa për të gjithë të lënduarit urojmë shërim sa më të shpejtë. Zoti e bekoftë Shqipërinë dhe popullin e saj!
Me respekt,
Agim Ademi, president i FFK-së
