Partizani i këtij sezoni nuk po gjen qetësi, edhe pse pas 12 javësh kampionat renditet në vendin e parë. Trajneri Frenco Lerda ka qenë disa herë protagonist, teksa është kapur me lojtarët dhe pas ndeshjes me Kukësin pati një incident edhe me Dritan Mehmetin, ndihmësin e italianit që pas asaj ngjarjeje kaloi te PartizaniB.
Në klubin e kuq nuk e kanë anashkaluar atë që ka ndodhur dhe sipas asaj që raporton “Newsport.al”, Lerda është gjobitur. Bëhet fjalë për një shumë të konsiderueshme, që kap shifrën e 7 mijë eurove. Sigurisht që trajneri i “demave” nuk e pa pritur mirë vendimin.
Artikulli mbi gjobën e Lerdës vijon me një tjetër detaj interesant dhe që vë në dukje sjelljen e italianit në seancën e djeshme stërvitore. Italiani raportohet të ketë qëndruar gjithë kohën në cepin e fushës dhe më pas është larguar menjëherë.
Ditën e nesërme, në konferencën e zakonshme për shtyp, Lerda do të mund të flasë edhe për këtë çështje që nuk i takon fushës së blertë. Sigurisht nëse ai dëshiron ta bëjë diçka të tillë. /abcnews. al
