Një shpërthim në frontin midis Izraelit dhe Hezbollahut është regjistruar orët e fundit në Lindjen e Mesme.
Grupi libanez njoftoi një sulm ndaj Izraelit me një numër të madh dronësh, si hakmarrje për vrasjen e komandantit ushtarak, Fouad Soukr, në një sulm ajror izraelit në një periferi të Bejrutit muajin e kaluar. Në një deklaratë më të fundit, grupi tha se kishte përfunduar “fazën e parë” të hakmarrjes, duke pretenduar se kishte goditur 11 objektiva ushtarake izraelite dhe kishte lëshuar më shumë se 320 raketa.
Nga ana e saj, ushtria izraelite njoftoi në orët e para të mëngjesit se po ndërmerrte sulme ajrore parandaluese në Liban, si një veprim parandalues pasi tha se Hezbollahu po përgatitej të lëshonte raketa drejt Izraelit.
Ministri i Mbrojtjes i Izraelit, Yoav Gallant ka shpallur gjendjen e jashtëzakonshme në frontin e brendshëm për 48 orët e ardhshme – kjo do të thotë se mund të vendosen kufizime për lëvizjen civile. Zyra e kryeministrit izraelit Benjamin Netanyahu tha se Këshilli i Sigurimit i vendit po mblidhej.
“Ne kemi vëzhguar përgatitjet e Hezbollahut për sulme në shkallë të gjerë kundër territorit izraelit,” tha ushtria izraelite në një mesazh të shkruar në arabisht për banorët e Libanit jugor.
“Kushdo që ndodhet pranë zonave ku vepron Hezbollahu duhet të largohet menjëherë (…) për mbrojtjen e tyre dhe të familjes së tyre”, thuhet në tekst.
Në një video të publikuar përmes X, zëdhënësi i ushtrisë izraelite Daniel Hagari theksoi se “aeroplanët luftarakë aktualisht po sulmojnë” pozicionet e Hezbollahut.
Sipas mediave izraelite, fluturimet për dhe nga Aeroporti Ndërkombëtar Ben Gurion, afër Tel Avivit, u pezulluan për shkak të operacioneve, ndërsa ushtria izraelite tha se kishte aktivizuar sirenat e mbrojtjes ajrore, duke u bërë thirrje banorëve të nxitojnë në strehimore, në pjesën veriore të vend, në kufi me Libanin./abcnews.al
