Në prag të zgjedhjeve në Universitet përfaqësues të shoqërisë civile, studentëve dhe pedagogëve kanë akuzuar drejtues të institucioneve të arsimit të lartë dhe kandidatë në garë për plagjiaturë. Atyre i kanë kërkuar tërheqjen ndërsa ministrisë së Arsimit pezullimin e Rektorit të Universitetit të Tiranës dhe zgjedhjeve deri në shqyrtimin e çështjes.
“Artan Hoxha i cili do të duhet të ishte shembulli perfekt sesi një drejtues do duhet të ishte dhe të frymëzojë stafin që drejton dhe studentët dhe të tregojë vlerat e vërteta të një profesori jo vetëm që nuk e bën këtë por reflekton shembull se si një rektor nuk duhet të jetë, por gjithsesi rasti i rektorit nuk është i vetmi në fakultetin e drejtësisë Dorina Hoxha kandidon në garë për tu bërë dekane dhe nga i njëjti skandal bërë publik pak ditë më parë ka kryer plagjiaturë së bashku me kandidatin për dekan Bernard Dosti rezulton po ashtu se ka kryer plagjiaturë”, tha studenti Igli Llapaj.
“Në ditën kur drejtuesit e universitetit kapen me plagjiaturë njerëzit qe duhet ta zgjidhnin luajnë ping-pong me shqetësimin tonë. Këshilli i Etikës thotë duhet ta sjellin pedagogët denoncimin, pedagogët thonë e ka senati, senati thotë e ka ministria, ministrja thotë se e ka presidenti dhe presidenti pret që ta zgjidhin pedagogët “, u shpreh Mateo Yskollari, student.
Shoqëria civile thotë se do ti drejtohet gjithashtu institucioneve të drejtësisë.
“Ne kemi kërkuar formularin antiplagjiaturë që kanë firmosur të gjithë kandidatë në këtë universitet secili prej tyre ka deklaruar se nuk ka plagjiaturë në punimet e tij këtë formular do t’ia lemë prokurorisë dhe organeve të tjera të gjykatës për ta verifikuar në qoftë se kjo është e drejtë apo e padrejtë dhe të gjithë ata që janë sot në këtë këshill etike në komisionin institucional zgjedhor do ti çojmë për shpërdormi detyre që po heshtin”, tha Rigels Xhemollari, “Qëndresa Qyetare”.
Ndërkohë studentë e pedagogë shprehën shqetësimin se në zgjedhjet për drejtuesit e rinj të institucioneve të arsimit të lartë që do të zhvillohen me 21 qershor në pesë universitete nga gjashtë në Tiranë ka vetëm një kandidat për Rektor.
“Është e jashtëzakonshme shtypja dhe mungesa e hapësirës për alternativë, universitetet e fundit në Evropë nuk kanë brenda tyre alternative për të dalë. Profesorët dhe studentët do të shkojnë të votojnë, por nuk do të shkojnë të zgjedhin sepse nuk kanë alternativë se kë të zgjedhin”, tha Migen Qeraxhi, “Qëndresa Qytetare”.
“Nuk ka garë është me një kandidat se nuk pranuan të tjerë të vinin kandiaturën se ka një dorë të zezë që ka uzurpuar universitetet”, tha Lush Susaj, Sindikata e Punonjësve të Universiteteve të Shqipërisë.
Sipas tyre kjo reflekton mungesën e hapësirës për alternativa që të mund të ndryshonin renditjen e universiteteve shqiptarë në rankimet ndërkombëtare.
ZGJEDHJET PER REKTOR
Universiteti Politeknik i Tiranës Akli Fundo
Universiteti I Tiranës Artan Hoxha
Universiteti Bujqësor I Tiranës Fatbardh Sallaku
Universiteti i Mjekësisë së Tiranës Xheladin Draçini
Universiteti I Sporteve Agron Kasa
Universiteti I Arteve Artan Peqini Erald Bakalli
/abcnews.al
