Militantë të dyshuar myslimanë sunitë vranë të paktën pesë anëtarë të forcave iraniane të sigurisë në dy sulme të veçanta ndaj selisë së Gardës Revolucionare të Iranit në provincën juglindore të vendit, Sistan-Baluchestan.
Të paktën 15 militantë u vranë në përleshjet gjatë natës midis grupit Jaish al-Adl dhe forcave të sigurisë në qytetet iraniane të Chabahar dhe Rask në provincë.
“Terroristët nuk arritën qëllimin e tyre për të marrë kontrollin e selisë së Gardës në Chabahar dhe Rask,” tha zëvendësministri i Brendshëm Majid Mirahmadi për televizionin shtetëror.
10 oficerë të tjerë të sigurisë u plagosën në përleshjet në këtë zonë, e cila ka një popullsi kryesisht myslimane sunite.
Jaish al-Adl, një grup ekstremist militant mysliman sunit, tha se kërkon të drejta dhe kushte më të mira jetese për pakicat etnike që jetojnë në Iranin kryesisht shiit, e cila është cilësuar si organizatë terroriste nga Irani, SHBA, Japonia dhe Zelanda e Re.
Organizata ka marrë përgjegjësinë për disa sulme në vitet e fundit ndaj forcave iraniane të sigurisë në provincën juglindore të vendit. Zona kufizohet me Afganistanin dhe Pakistanin dhe ka qenë prej kohësh vendi i përleshjeve midis forcave të sigurisë së Iranit dhe militantëve sunitë.
Në dhjetor, grupi sulmoi një stacion policie në qytetin Rask, duke vrarë 11 oficerë sigurie dhe duke plagosur disa të tjerë.
Në janar, Teherani vuri në shënjestër dy baza të Jaish al-Adl në Pakistan me raketa, duke shkaktuar një përgjigje të shpejtë nga Islamabadi që synonte ata që tha se ishin militantë separatistë në Iran.
/abcnews.al
