Presidenti i Shteteve të Bashkuara të Amerikës, Joe Biden priti homologun ukrainas Zelensky në Shtëpinë e Bardhë, nga ku njoftoi dhe paketën e re të ndihmës 200 milionë dollarë për Kievin.
“Askush nuk duhet të harrojë se të qenit këtu, në këtë situatë, dy vjet më vonë është tashmë një fitore e madhe”, u shpreh Biden.
“Putini ka dështuar të nënshtrojë Ukrainën”, shtoi presidenti amerikan, duke nënvizuar se amerikanët “mund dhe duhet të jenë tepër krenarë” për mbështetjen e dhënë për Kievin.
Kreu i Shtëpisë së Bardhë deklaroi se në të ardhmen Ukraina duhet të jetë pjesë e aleancës së NATO, por për momentin fokusi duhet të jetë te fitorja e luftës.
Ndërkohë, presidenti Zelensky pasi falënderoi Biden për mbështetjen e vazhdueshme, u shpreh se Ukraina për asnjë moment nuk do të heqë dorë nga sovraniteti i saj.
Në një postim në mediat sociale pas takimit, Zelensky e përshkroi bisedën si “miqësore dhe të sinqertë” dhe falënderoi udhëheqësin e shumicës së Senatit Chuck Schumer dhe udhëheqësin e pakicës Mitch McConnell “për udhëheqjen e tyre personale në mbështetjen dypartiake për Ukrainën midis ligjvënësve amerikanë”.
Disa republikanë që morën pjesë në atë takim thanë se mbetën të palëkundur pasi dëgjuan kërkesën e Zelenskyt për ndihmë, duke këmbëngulur se Biden kishte ende nevojë të bënte kompromise.
/abcnews.al
