U duk se gjithçka u zgjidh pas golit të Luca Modric dhe Real Madrid do të fitonte me goleadë, por Granada tregoi se nuk gjendet rastësisht në vend të dytë. Miqtë shënuan dy herë brenda 9 minutash dhe në Santiago Bernabeu u shtua frika dhe paniku. Gjithsesi, djemtë e Zidane arritën të ruanin avantazhin, shënuan përsëri dhe u rikthyen te fitorja pas barazimit zhgënjyes përballë Club Brugge në Champions.
Sfida mes dy vendeve të para u zhbllokua shumë shpejt. Gareth Bale lëvizi bukur në krahun e djathtë dhe dhuroi një asist fantastik për Benzema që në minutën e dytë. Francezi nuk e pati të vështirë për të shënuar dhe kaluar Realin në avantazh.
Fundi i pjesës së parë dhuroi emocionet e para të Eden Hazard. Belgu u zhbllokua më në fund, duke gjetur golin e parë me ekipin e ri. Valverde ishte autori i asistit, ndërsa Hazard dhuroi spektakël brenda zonës, duke shënuar me anë të një parabole të bukur.
Reali shënoi sërish në pjesën e dytë. Luca Modric lëshoi një të djathtë fantastike dhe në Santiago Bernabeu nisi festa. Granada u rizgjua dhe shkurtoi diferencën me anë të një penalltie në minutën e 69-të.
Miqtë u hodhën në sulm dhe goli i dytë nuk vonoi. Duarte shfrytëzoi një goditje këndi dhe mposhti Areolën, duke hapur takimin dhe frikësuar “Los Blancos”. Ishte minuta e 77-të, por vendasit menaxhuan avantazhin dhe vulosën “pokerin” e golave me anë të James Rodriguez në minutat shtesë. Kjo fitore e ngjit Realin në kuotën e 18 pikëve, ndërsa Granada mbetet e dyta me 4 pikë më pak. /abcnews.al
Real Madrid – Granada 4-2
(Benzema 2’, Hazard 45+1’, Modric 61’, Rodriguez 90+2’ / Machis (pen) 69’, Duarte 77’)
