Presidenti serb Aleksandër Vuçiç i është përgjigjur kundërshtarit politik Vojislav Koshtunica që propozon modele të huaja si zgjidhje për çështjen e Kosovës. Ndonëse nuk e ka përmendur, Vuçiç ka lënë të kuptohet se pavarësia e Kosovës është një realitet dhe u ka bërë thirrje rivalëve që të mos jetojnë në ëndrra.
Këto ditë, i lutur të komentojë idenë e ish-kryeministrit serb, Vojislav Koshtunica që për zgjidhjen e çështjes së Kosovës ka mundur të merret modeli i Hong Kongut, për një autonomi thelbësore si zgjidhje e qëndrueshme statusore’, presidenti aktual serb, Aleksandar Vuçiq,me përgjigjen që dha sikur rikujtoi atë fjalën tone të urtë – kur hesapet bëhen pa hanxhinë:
Aleksandër Vuçiç, President i Serbisë: “Pyetja ime për ju është: çfarë domethënë ‘si Hong Kongu’? Që ne të huazojmë territorin për njëqind vjet. Me kë keni biseduar, kush ka për ta pranuar këtë nga shqiptarët të cilët tash më kanë jo pavarësinë e huazuar, por të fituar gjatë mandatit tuaj kryeministror e presidencial të Boris Tadiqit. Përse nuk ua thatë atëherë? Përse nuk e shndërruat në vepër?”, tha Vuçiq duke vlerësuar ‘pakuptimësinë e gjithë idesë së riaktualizuar’:
Aleksandër Vuçiç, President i Serbisë: “Hajdeni, njëherë të pushojmë së gënjyeri vetëveten. Hajdeni të reshtim së treguari përralla për vetëveten. Të mos sillemi sikur jemi fuqia më e madhe në botë. Të mos silllemi sikur ne caktojmë se Toka do të rrotullohet rreth Diellit. Të mos flasim marrëzira dhe tëndërrojmë çdo ditë tezat dhe që gjithçka na pëlqen përveç të vërtetës, sepse të vërtetën veshët tanë të ndjeshëm kurrsesi nuk duan ta dëgjojnë!”, tha Vuçiç fundjavën e kaluar në një takim me një përfaqësi të serbëve të Republika Serpskës në ballë me liderin e saj Milorad Dodik duke rikujtuar se Kosova kishte shpallur pavarësinë pikërisht në kohën kur Vojislav Koshtunica ushtronte postin e kryeministrit. Atëbotë, rikujtoi presidenti serb, nuk ishte përmendur Hong Kongu, por ishte lëshuar vetëm një kumtesë.
Aleksandër Vuçiç, President i Serbisë: “Njerëz, pushoni të gënjeni vetëveten. E gënjeni veten, nuk e gënjeni vetëm publikun vendor, po e gënjeni veten, të gjithë së bashku. Mashtroni publikun, të gjithë së bashku. Ua thoni njerëzve cila është e vërteta dhe brenda këtyre kornizave të provojmë të gjejmë diçka që mund ta bëjmë”, përfundoi Aleksandar Vuçiq duke ripërmendur – veshët:
Aleksandër Vuçiç, President i Serbisë: “Veshët e ndjeshëm serbë dëshirojnë të dëgjojmë më shumë një rrenë të ëmbël sesa të vërtetën e hidhur!”.
Mesazhet e këtilla të presidentit të Serbisë, nga analistë të huaj në Beograd, por edhe në Sarajevë, merren si sinjal për përgatitjen e terrenit për arritjen e një marrëveshjeje të qëndrueshme me Qeverinë e Kosovës, që do të dale pas zgjedhjeve të gjashtë tetorit, por edhe si porosi për lidershipin e Republika Serpskës Dodik që të zbusë retorikën nacionaliste që bie ndesh me Marrëveshjen e Dejtoin për Bosnjë e Hercegovinë. /ABC news Albania 24/7
