Të paktën dy persona kanë humbur jetën nga përmbytjet në Rusinë jugore, ndërsa një grua vdiq si pasojë e zjarreve në pyll në rajonin e Uralit.
Agjencia e lajmeve RIA raportoi se trupat e pajetë të një gruaje dhe një burri u gjetën mëngjesin e sotëm kur ujërat u tërhoqën në Tuaps, një qytet bregdetar në Detin e Zi rreth 100 kilometra nga vendpushimi i Soçit.
Përmbytjet janë shkaktuar nga shirat e rrëmbyeshëm të djeshëm. Guvernatori rajonal Benjamin Kondratiev tha se trefishi i shiut mesatar mujor ra në vetëm një ditë, duke çuar në evakuimin e kampistëve nga një pyll aty pranë.
Videot e postuara në mediat sociale treguan rrugët e qytetit të kthyera në lumenj, makina të zhytura në ujë dhe banorë që kanë mbetur të bllokuar. Sipas autoriteteve lokale, disa janë ende të zhdukur.
Mijëra kilometra larg, në rajonin Urali të Rusisë qendrore, një zjarr pyjor që përfshiu fshatin e vogël Saidurikha, në veri të Yekaterinburgut, shkaktoi një viktimë. Zjarri u përhap më shpejt për shkak të thatësirës dhe erërave dhe dogji 41 shtëpi. Dy persona të tjerë u shtruan në spital me djegie.
Autoritetet kanë shpallur gjendjen e jashtëzakonshme në shumë zona të Rusisë këtë verë për shkak të zjarreve.
Në vitin 2021, sezoni i zjarreve ishte më i gjati në Rusi, me më shumë se 188 milionë hektarë tokë pyjore të shkrumbuara, sipas Greenpeace Russia, që është rreth dyfishi i madhësisë së Irlandës.
/abcnews.al
