Erzeni dështoi të arrinte një fitore pasditen e somte ndaj “bardhebluve” të Tiranës, duke e mbyllur kështu kampionatin në vendin e 8-të të rendijtes dhe tashmë duhet të luajë ndeshjen e “play-out” ndaj Korabit të Peshkopisë, për të mësuar se kush është skuadra e 10-të, e cila do të jetë pjesë e Abissnet Superiore, sezonin e ardhshëm.
Pas humbjes së sotme, disa fjalë për mediat i dha dhe trajneri i “shijakasve” të Erzenit, Alfred Deliallisi, i cili e konsideroi përballjen e sotme ndaj Tiranës, si një ndeshje me një speicifikë të veçantë e më tej komentoi gjithashtu dhe zëvendësimet e bëra në pjesën e dytë të lojës.
“Ishte një ndeshje që kishte specifikë ndryshe nga ndeshjet e tjera, sepse duke parë dhe rezultate duhet të menaxhonim energjitë, pasi siç e patë në pjesën e dytë bëra dhe disa zëvendësime, pasi duhet të mendojmë dhe për ndeshjen e play-out”,- u shpreh fillimisht tekniku i Erzenit.
Në përfundim të fjalës së tij, Deliallisi u pyet nga gazetarët për rëndësinë e ndeshjes së “play-out” ndaj Korabit, teksa tha se që nga dita e nesërme do të nisë puna për të siguruar mbijetesën në Superiore, ku e konsideroi kundështarin, si një ekip të fortë e me shumë eksperiencë.
“Është një ndeshje që duhet vlerësuar maksimalisht, si nga unë, por dhe nga të gjithë lojtarët. Për ne nuk ka festë nga ky moment, do të ulim kokën e do të vazhdojmë punën nesër sepse lojtarët janë të shkatërruar, duhet rigjenerim, duhet të marrim energjitë e nevojshme për ndeshjen e radhës, e cila është shumë e rëndësishme dhe shumë e vështirë.
Ndeshja ka një rëndësi të veçantë. Unë e njoh mirë Kategorinë e Parë, sepse edhe vitin e shkuar isha pjesë e Erzenit, kur u ngrit në Supeiore dhe e di se çfarë do të thotë kjo ndeshje për atë lloj ekipi, plus ka lojtarë me shumë eksperiencë dhe kërkon impenjim maksimal nga unë dhe ekipi im”,- tha në përfundim të fjalës së tij, tekniku Deliallisi. /i.m /abcnews.al
