Britania e Madhe ka urdhëruar një hetim urgjent pas raportimeve se dokumentet në lidhje me funksionimin e një nëndetëse 1.3 miliardë paund u gjetën në tualetin e një pijetoreje në Anglinë veriperëndimore!
Sipas një raporti të gazetës britanike The Sun, dokumentet që përmbajnë detaje të nëndetëses me energji bërthamore HMS Anson u gjetën në një pijetore në Cumbria. Dokumentet dyshohet se treguan funksionimin e brendshëm të nëndetëses dhe u përdorën nga anëtarët e ekuipazhit për të mësuar se si të izolojnë dhe dekompresojnë komponentët e sistemit të saj.
Marina Britanike u përpoq të minimizonte çështjen me një zëdhënës duke thënë se “këto janë dokumente të përgjithshme trajnimi që nuk përmbajnë informacion të klasifikuar. Megjithatë, ne i marrim jashtëzakonisht seriozisht të gjitha çështjet e sigurisë dhe do të hetojmë rrethanat e zbulimit të tyre”.
HMS Anson është e pesta nga nëndetëset e reja të sulmit të klasit Astute që i bashkohet flotës së Marinës Mbretërore. Këto nëndetëse mund të lëshojnë raketa Tomahawk dhe përshkruhen në faqen e internetit të Marinës Britanike si “nëndetëset më të mëdha, më të avancuara dhe më të fuqishme të sulmit” që ka përdorur ndonjëherë./abcnews.al
