Të burgosurit në qendrën e paraburgimit në bazën amerikane të Gjirit të Guantanamos në Kubë po tregojnë shenja të “plakjes së shpejtë”, sipas një zyrtarit të Komitetit Ndërkombëtar të Kryqit të Kuq (ICRC).
“Ne i bëjmë thirrje qeverisë dhe Kongresit të SHBA-së që të bashkëpunojnë për të gjetur zgjidhje adekuate dhe të qëndrueshme për të adresuar çështjen,” tha Patrick Hamilton, kreu i misionit të KNKK-së për SHBA dhe Kanada.
Komentet e Hamilton erdhën pasi ai vizitoi Guantanamon në mars, i pari i tij në 20 vite.
“Isha i shokuar se si ata që janë ende në paraburgim sot tregojnë shenja të plakjes së shpejtë, të përkeqësuar nga efektet kumulative të përvojave të tyre dhe viteve të kaluara në paraburgim,” tha ai.
Ai bëri thirrje që të burgosurit të marrin ndihmën e duhur mjekësore dhe psikiatrike dhe të takojnë më shpesh familjarët e tyre. Një zëdhënës i Pentagonit tha se Departamenti i Mbrojtjes i SHBA-së “po shqyrton raportin”.
Qendra e paraburgimit në Gjirin e Guantanamos u krijua nga presidenti amerikan George Ë. Bush në vitin 2002 për të transferuar atje të dyshuarit për terrorizëm pas sulmeve të 11 shtatorit 2001.
Që atëherë është bërë simbol i “luftës kundër terrorizmit” të SHBA-së. Kur Joe Biden mori detyrën në vitin 2021, 40 persona ishin të burgosur në Guantanamo.
Qeveria e tij ka thënë se dëshiron të mbyllë qendrën e paraburgimit, por nuk ka paraqitur një plan për ta bërë këtë. Pas riatdhesimit të dy vëllezërve në Pakistan në shkurt, 30 të burgosur mbeten në Gjirin e Guantanamos.
/abcnews.al
