Gjykata Penale në Shkup ka refuzuar një kërkesë të Zëvendëskryeministrit Bujar Osmani për të vizituar në burg ish-pjesëtarin e Ushtrisë Çlirimtare të Kosovës, gjakovarin Tomorr Morina, i cili u ndalua disa ditë më parë në bazë të një flet-arresti të lëshuar nga Interpoli. Ndërkohë, në fillim të javës së ardhshme Ministria e Drejtësisë pritet t’i përgjigjet zyrtarisht kërkesës së Serbisë për ekstradimin e tij.
Përgatiti: Sladin Xhezairi
Ndalimi i ish-pjesëtarit të UÇK-së, Tomorr Morina, nga policia e Maqedonisë së Veriut, ka vënë në pozitë aspak të lehtë drejtësinë në Shkup. Menjëherë pas ndalimit, Ministria serbe e Drejtësisë kërkoi ekstradimin e tij, pasi ai dyshohet për implikim në ato që Beogradi i quan krime lufte në rajonin e Gjakovës në vitin 1999, ndërkohë që Ministria e Jashtme e Kosovës kërkoi lirimin e menjëhershëm të Morinës: “Nuk do të lejojmë ekstradimin e asnjë qytetari tanë bazuar në flet-arrestet e lëshuara nga Beogradi. Kjo është vijë e kuqe për Kosovën,”– ishte reagimi i kryediplomatit Behgjet Pacolli.
Fitohet përshtypja se kërkesa për ekstradim do të ketë fatin e shumë flet-arresteve të tjera,të lëshuara edhe për figurat më të shquara të jetës politike kosovare, që ndonëse fillimisht u ndaluan, në vende të tjera, megjithatë nuk iu dorëzuan organeve serbe. Edhe avokati i njohur serb, Goran Petronijeviç, i ka deklaruar Televizionit të Beogradit se nuk është optimist për dorëzimin e Tomorr Morinës:
“Është një situatë tepër specifike në të cilën ndodhet Maqedonia e Veriut, duke marrë parasysh strukturën kombëtare të këtij shteti dhe sidomos strukturën e pushtetit që mbështet kryeministrin Zoran Zaev dhe këta janë para së gjithash shqiptarët. Gjasë më të mëdha janë se kërkesa e Serbisë për dorëzimin e Morinës do të refuzohet”, parashikon avokati nga Beogradi, Goran Petronijeviq.
Ndërkohë, këtë javë Gjykata Penale në Shkup refuzoi një kërkesë të Zëvendëskryeministrit Bujar Osmani dhe të Zëvendësministrit të Brendshëm Agim Nuhiu, që të vizitojnë në burg shtetasin e ndaluar kosovar me arsyetimin se postet që ata i ushtrojnë nuk lejojnë vizitat e të arrestuarave. Pavarësisht kësaj, televizioni Klan mëson se ka shumë të pak gjasë, për të mos thënë fare, që ish-pjesëtari i UÇK-së t’i dorëzohet Serbisë. Sidoqoftë, vendimi për këtë do dihet javën në të cilën po shkelim./ABC News Albania 24/7
