Këngëtarja shqiptare me famë ndërkombëtare, Rita Ora, ka uruar shqiptarët e Kosovës me rastin e 15-vjetorit të Pavarësisë.
Përmes një video-mesazhi, ajo nuk nguroi të shprehte edhe një herë mirënjohjen për bashkëkombësit e saj, që e kanë mbështetur gjithmonë.
“Do të mund të flisja pa u ndalur për rrugëtimin tim me njerëzit e mi në Kosovë. Urime Pavarësia Kosovë dhe faleminderit për të gjitha këto vite krenarie dhe mbështetjeje”, ka thënë ndër të tjerash Rita.
Video-mesazhi i plotë i këngëtares do të transmetohet i plotë në koncertin festiv të RTK-së me rastin e përvjetorit të Pavarësisë, të titulluar “Rrno për me tregue”.
Kujtojmë që Rita i ka treguar gjithmonë ndjenjat e saj patriotike, pasi nuk është frenuar asnjëherë të flasë publikisht për traditat e origjinës së saj. Madje, i ka dedikuar edhe një këngë Kosovës në vitin 2012 me titull “Shine Ya Light”./abcnews.al
