Një person është plagosur me armë zjarri në Vlorë. I plagosur ka mbetur shtetasi Defrim Pashaj, 40 vjeç. Gazetari i Abc News, Elton Nika raporton se ngjarja ka ndodhur te Uji i Ftohtë në zonën e quajtur si 7 pallatet. Mësohet se ngjarja ka ndodhur pas një konflikti çasti me një tjetër person.
Falë reagimit të menjëhershëm të policisë është arrestuar në flagrancë autori i ngjarjes Ledjon Zahaj.
Njoftimi i policisë
Plagosi me armë zjarri, një 40-vjeçar, falë reagimit në kohë nga Policia, kapet dhe vihet në pranga autori i dyshuar.
Gjatë kontrollit të banesës së autorit, Policia ka gjetur dhe sekuestruar një armë gjahu.
Rreth orës 16:00, në lagjen “10 Korriku”, shtetasi L. Z., 38 vjeç, dyshohet se pas një konflikti për motive të dobëta, ka plagosur me armë zjarri, shtetasin D. P., 40 vjeç, të dy banues në lagjen “10 Korriku”, Vlorë.
Shërbimet e Policisë, falë koordinimit në kohë me sallën e operative të DVP Vlorë, kanë bërë të mundur menjëherë kapjen dhe neutralizimin e autorit të dyshuar, shtetasit L. Z.
Ndërkohë, i plagosuri, shtetasi D. P., aktualisht po merr ndihmë mjekësore në spital dhe ndodhet jashtë rrezikut për jetën.
Nën drejtimin e Prokurorisë vijojnë veprimet për dokumentimin e plotë të rrethanave të ngjarjes./abcnews.al
