Sekretari i Përgjithshëm i NATO -s Jens Stoltenberg mbërriti sot në Korenë e Jugut, vizita e parë e turneut të tij, i cili përfshin Japoninë, që synon forcimin e lidhjeve me aleatët e SHBA-së në sfondin e luftës në Ukrainë dhe rivalitetit në rritje me Kinën.
Në kryeqytetin e Koresë së Jugut, Seul, Stoltenberg u takua me Ministren e Jashtme Park Jin dhe pritet të takohet me Presidentin Yun Suk-geol dhe Ministrin e Mbrojtjes Kombëtare Lee Jong-sup.
NATO është e shqetësuar për testet e raketave të Koresë së Veriut dhe programin bërthamor, ndërsa lufta në Ukrainë ka implikime për Azinë, tha Stoltenberg në fillim të takimit të tyre, duke përmendur dyshimet se Koreja e Veriut po ofron mbështetje ushtarake për përpjekjet luftarake të Rusisë.
“Kjo thjesht nënvizon madhësinë e ndërlidhjes që ekziston mes nesh,” vuri në dukje ai.
Të dy zyrtarët cituan “vlera të përbashkëta” midis vendeve të NATO-s dhe Koresë së Jugut. Shefi i NATO-s pritet të vizitojë Tokion të hënën, ku do të takohet me kryeministrin japonez Fumio Kishida dhe zyrtarë të tjerë japonezë.
Ndërsa NATO vazhdon të fokusohet në Europë dhe Amerikën e Veriut, anëtarët e saj preken nga çështjet në mbarë botën, theksoi Stoltenberg në një intervistë me agjencinë e lajmeve të Koresë së Jugut Yonhap.
/abcnews.al
