SHBA ka njoftuar një paketë të re ndihme prej 400 milionë dollarësh për Ukrainën, e cila do të përfshijë armë, municione dhe pajisje të mbrojtjes ajrore.
“Municionet e artilerisë, zjarret precize, raketat e mbrojtjes ajrore dhe mjetet taktike që ne po ofrojmë do t’i shërbejnë më së miri Ukrainës në fushën e betejës”, tha në një deklaratë sekretari amerikan i shtetit”, Antony Blinken.
Pentagoni tha se paketa përfshinte municione shtesë për sistemet e mbrojtjes ajrore NASAMS, sisteme raketash artilerie me lëvizshmëri të lartë (HIMARS), plus mitralozë të rëndë me pamje termike për t’iu kundërvënë dronëve rusë dhe më shumë se 20 milion fishekë municionesh të armëve të vogla.
Paketa përfshin gjithashtu më shumë se 200 gjeneratorë për të ndihmuar Ukrainën të përballet me ndërprerjet e energjisë elektrike të shkaktuara nga sulmet ruse në infrastrukturën energjetike.
Sekretari i shtypit i Pentagonit, gjeneral brig Pat Ryder, tha se gjeneratorët kanë qëllim të mbështesin nevojat e fuqisë civile dhe ushtarake për të lehtësuar presionin në rrjet.
Presidenti i Ukrainës, Volodymyr Zelensky, falënderoi presidentin Joe Biden për paketën e re dhe u zotua se vendi i tij nuk do të trembet nga sulmet terroriste frikacake çnjerëzore të kriminelëve rusë të luftës.
