Monarku i ri britanik, i cili do të qëndrojë në zi deri më 26 shtator, thuhet se ka zgjedhur Francën si destinacionin e tij të parë pas takimit me Emmanuel Macron në Londër, ku diskutuan për çështje mjedisore.
Në vend që të vizitojë një nga vendet e Komonuelthit në udhëtimin e tij të parë jashtë vendit, Charles pritet të udhëtojë në Paris muajin e ardhshëm në një turne që mund të përfshijë edhe Gjermaninë.
Mbreti Charles dhe zoti Macron thuhet se ndajnë një “miqësi të ngrohtë” dhe vitin e kaluar ndanë një platformë në Cop26 në Glasgoë për të inkurajuar atë që mbreti e quajti një “mundësi të çmuar” për të ndihmuar në shpëtimin e planetit.
Edhe pse ende nuk janë bërë plane për më shumë udhëtime jashtë shtetit, Charles pritet të shkojë në Australi dhe Zelandën e Re në fillim të vitit të ardhshëm.
Zyra e Jashtme, e cila merr vendimin përfundimtar për vizitat mbretërore, thuhet se dëshiron të përdorë fuqinë diplomatike të monarkisë për të përmirësuar marrëdhëniet me fqinjët e saj kryesorë evropianë pas Brexit.
Burime pranë monarkut thanë se Mbreti i ri është i emocionuar nga përhapja e mbështetjes publike për të në ditët e fundit, megjithëse ai është ende i pikëlluar dhe ndihet i lodhur pas dy javësh rraskapitëse të mbushura me paraqitje zyrtare. /abcnews.al
