Rusia ka marrë kontrollin e fabrikës së çelikut Azovstal, tha ministria e mbrojtjes e vendit të premten në mbrëmje.
“Strukturat nëntokësore të Azovstal ku fshiheshin militantët janë tani nën kontrollin e plotë të forcave të armatosura ruse”, tha ministria në një deklaratë, duke shtuar se në total 2,439 luftëtarë ukrainas janë dorëzuar.
Ministri rus i mbrojtjes Sergei Shoigu i raportoi presidentit Vladimir Putin sonte se fabrika e çelikut Azovstal në Mariupol është “çliruar plotësisht” nga luftëtarët ukrainas, shkruan Skynews.
Ministria tha se grupi që ishte “dorëzuar” përbëhej nga 531 persona.
Lexo edhe: Londra do të transferojë azilkërkuesit në Ruandë, përfshirë ukrainasit
Në një deklaratë, ministria tha: “Territori i uzinës metalurgjike Azovstal është çliruar plotësisht”.
Azovstal konsiderohej të ishte bastioni i fundit i madh në qytetin e rrethuar të Mariupolit dhe ishte bërë një simbol i rezistencës ukrainase.
Qyteti port jugor ka qenë një objektiv kryesor për Vladimir Putin, pasi pushtimi i tij do të krijonte një korridor tokësor midis Krimesë së aneksuar dhe rajoneve të kontrolluara nga separatistët pro-ruse të Luhanskut dhe Donetsk (të njohura si Donbas)./abcnews.al/
