Kryeministri Edi Rama ka folur pasi vizitoi ish-Presidentin Hashim Thaçi në burgun e Hagës, Haaglenden, ku ai ndodhet prej dhjetorit të vitit 2020.
Teksa e cilësoi vizitën çmallje e nevojshme, Rama tha se Thaçi është në gjendje të mirë dhe i bindur për pafajësi.
“Ishte një çmallje e nevojshme. Presidentin Thaçi e gjeta në top formë, i bindur mbase dhe më shumë se kur e kam takuar më parë se të vinte këtu, se kjo ishte një rrugë e pashmangshme për të provuar katërcipërisht përpara drejtësisë, pastërtinë e plotë të luftës çlirimtare dhe natyrisht edhe pastërtinë e idealit të luftëtarëve të Ushtrisë Çlirimtare të Kosovës, të udhëheqësve të UÇK-së. Nuk ka shumë për të thënë”, tha Rama.
Kryeministri u shpreh i bindur se lufta çlirimtare e Kosovës nuk mund të rishkruhet.
“Natyrisht që të gjithë në jemi të bindur se lufta çlirimtare e Kosovës nuk mund të rishkruhet dhe as nuk mund kurrsesi të futet në korniza të tjera sepse ajo është tanimë e futur në kornizën e artë të heroizmit, sakrificave, e gjakut të dhënë dhe natyrisht e të gjitha përpjekjeve që kanë vijuar më tej në Kosovën e lirë dhe sovrane“, shton kryeministri.
/abcnews.al
