Amber Norsworthy jeton në Misisipi me katër fëmijët e saj. Ajo mori një njoftim në telefonin e saj në orën 3 pasdite kur ajo u kthye në shtëpi në datën 27 dhjetor. “Telefoni im bëri një zhurmë që nuk e kisha dëgjuar kurrë më parë”, thotë ajo. Njoftimi i tha asaj se një pajisje e panjohur kishte ndjekur lëvizjet e saj.
Zonja Norsworthy vazhdoi kërkimin e saj te aplikacioni “Find My” në iPhone-in e saj që i tregoi gjithë rrugën që kishte përshkuar. Ajo tha që në aplikacion shkruhej që “hera e fundit që pronari pa vendndodhjen tuaj ishte ora 15:02”. Ajo telefonoi policinë, të cilët i thanë se nuk dinin çfarë të bënin.
Ajo ende nuk e ka gjetur pajisjen, e cila beson se është diku në makinën e saj. Ajo thotë se Apple Support ishte në gjendje të konfirmonte se ishte një AirTag. “Tani e shikoj nga afër mjedisin tim”, thotë ajo. “BBC” ka folur me gjashtë gra të tjera në SHBA që thonë se janë gjurmuar duke përdorur Apple AirTags.
Pajisjet me madhësinë e butonit janë krijuar për të punuar me rrjetin “Find My” të Apple për të gjetur sendet e humbura. Në SHBA ka pasur raportime që pajisjet po përdoren për të gjurmuar njerëzit. Apple i tha “BBC-së”: “Ne e marrim shumë seriozisht sigurinë e klientit dhe jemi të përkushtuar ndaj privatësisë dhe sigurisë së AirTag”.
Kompania gjithashtu thotë se AirTags kanë karakteristika më të mira sigurie sesa produktet rivale. Megjithatë, ka prova në rritje se ato janë duke u përdorur për veprimtari kriminale në të gjithë SHBA-në. Ideja është se ato mund të ngjiten në bagazh ose çelësa, gjithçka që mund të humbisni.
Apple ishte në dijeni, shumë kohë përpara se të lëshonte AirTags se ato mund të përdoreshin për veprimtari kriminale. Me lëshimin e tyre, Apple tha se “AirTags janë krijuar për të gjurmuar artikujt dhe jo njerëzit”. Ata krijuan një sërë masash mbrojtëse që, thanë ata do t’i mbronin njerëzit nga gjurmimi.
Njerëzit me një iPhone do të njoftoheshin nëse një AirTag i paregjistruar po lëvizte me ta dhe AirTag-ët do të bënin një zhurmë kur ndaheshin nga pronari për një periudhë kohe. Në dhjetor, kompania lëshoi gjithashtu një aplikacion të cilin përdoruesit e Android mund ta shkarkojnë. Tracker Detect lejon përdoruesit që nuk janë në sistemin operativ iOS të njoftohen për një AirTag mashtrues, por për disa arsye shumë njerëz besojnë se këto masa mbrojtëse nuk shkojnë aq larg sa duhet. / abcnews.al
