Një 93 vjeçar britanik është surprizuar me një koncert në kopshtin e shtëpisë së tij.
Mediat e huaja raportojnë se familja e Dick Hockridge bëri një apel në rrjetet sociale duke kërkuar ndihmë për një performancë për pensionistin, i cili është një adhurues i madh i muzikës xhaz.
Apelit i janë përgjigjur pianisti Mark Deeks dhe këngëtarja Jennifer Hastings, të cilët mbërritën në kopshtin e Dick në Sunderland vetëm dy ditë më vonë.
Ata luajtën këngët me të cilat Dick dhe gruaja e tij Agnes kishin vallëzuar gjatë viteve, duke përfshirë të preferuarën e tyre të të gjitha kohërave Moon River.
Dick, një ish-punëtor i kantierit detar, u ul në dritare, duke kënduar së bashku, ndërsa anëtarët e emocionuar të familjes dhe fqinjët shikonin.
Në fund të koncertit, Dick mblodhi forcën për të thënë disa fjalë.
“Gëzuar Krishtlindjet dhe një Vit të Ri të gjithëve në mbarë botën. Paqja qoftë me ju. Faleminderit”, ka thënë ai./abcnews.al
