Kryedemokrati Lulzim Basha ka përcjellë një mesazh për ndarjen nga jeta të senatorit amerikan Bob Dole, ish-kandidati për president të SHBA-ve. Basha shkruan se ai ishte mik i shqiptarëve që na ka qëndruar pranë në momentet më vendimtare të kombit tonë. Ai veçon rolin e tij në Kosovë duke kujtuar bisedën që ka bërë me të një javë para zgjedhjeve.
“Me trishtim mora lajmin për ndarjen nga jeta të Bob Dole, mik i madh i shqiptarëve, që na ka qëndruar pranë në çastet më vendimtare dhe hapat më të rëndësishëm të kombit tonë .
Senatori Bob Dole ishte një nga zërat më të fortë dhe përcaktues në mbrojtje të të drejtave të shqiptarëve. Nga çlirimi dhe pavarësimi i Kosovës , tek sprovat e rrugës Euro-Atlantike të Shqipërisë dhe Kosovës, mbështetja e tij ishte një bekim i pazëvendësueshëm për kombin tonë.
Kam akoma të freskët bisedën e fundit me Senatorin Dole, javë përpara zgjedhjeve, këshillat, urimet dhe dëshirat e tij për Shqipërinë dhe Kosovën. Mirënjohje të përjetshme për këtë kolos të demokracisë amerikane! Lutjet dhe mendimet e mija shkojnë për familjen e Senatorit Dole, bashkëpunëtorët dhe kolegët e tij dhe kombin mik amerikan! U prehtë në paqe!”, shkruan Basha.
m.v/Abcnews.al
